Ko te whakahoutanga o te pae tukutuku o WhenuaViz, tētahi tutukinga nui i raro i te kaupapa hou o te Whenua Māori Programme.

I pānuitia tēnei kaupapa kāwanatanga e te Minita Whanaketanga Māori, e Nanaia Mahuta, i te marama o Huitanguru i tēnei tau. He mea ārahi te Whenua Māori Programme e Te Puni Kōkiri me Te Tāhū o Te Ture, otirā, ko te whāinga nui, he tiritiri i te one e puāwai ai ngā wawata o ngā whānau mō te whenua Māori.

Ko tētahi o ngā wāhi matua o te hōtaka, ko te whakatūnga o tētahi Whenua Knowledge Hub. Ka tū motuhake te pae tukutuku o te Whenua Knowledge Hub, e mau ana i te huhua o ngā kōrero, o ngā taputapu ā-mati, o ngā mahere hoki mā ngā kaipupuri whenua Māori e pā ana ki ngā āhuatanga katoa o te whakapakari whenua, arā, mai i te rironga tae atu ki ngā ara whakapakari whenua.

"Ko te mea nui ki a mātou, me eke te kounga o ngā mahi tautoko me ngā mōhiotanga ki te taumata e tika ana mā ngā kaipupuri whenua Māori e āhei ai rātou ki te āta whiriwhiri i ō rātou ake whakataunga," te kī a te Toihautū o Te Puni Kōkiri, a Michelle Hippolite.

Hei tāna, he tīmatanga noa te whakahoutanga o te pae tukutuku o WhenuaViz i te taha o te tari o Manaaki Whenua, i runga i te tūmanako, ka mahi ngātahi tonu rātou i roto i te wā.

Nā te pae tukutuku o WhenuaViz, he māmā ake te whakaputa pūrongo e hāngai ana ki ia poraka whenua. Kei roto i aua pūrongo ngā kōrero mō ngā āhuatanga o te one, o te āhuarangi me ngā momo ara mahi e hāngai ana ki tēnā me tēnā poraka whenua. Kei reira hoki tētahi ataata poto hei ārahi i ngā whānau ki te rapu kōrero i te pae tukutuku.

Hei tā te General Manager Māori Partnerships ki Manaaki Whenua, hei tā Holden Hohaia, "He mana tō te mātauranga, he nui tonu ngā mōhiotanga ki te pae tukutuku o WhenuaViz hei āwhina i ngā kaipupuri whenua Māori ki te whakamahi i ō rātou whenua."

Toroa te pae tukutuku o WhenuaViz ki, whenuaviz.landcareresearch.co.nz