E mihi ana ki te paepae o te Amorangi, ki tō tātou Matua nui i te Rangi. Korōria ki tōna ingoa tapu.

E mihi ana ki ngā tini mate e takoto atu ana ki ō tātou marae maha puta noa i te motu. Ngā mate o te rā, o te wiki, o te marama, o te tau, tae noa atu ki a rātou kua whetūrangitia. Haere atu rā koutou ki ō ipo kahurangi, ki ō raukura, ki ō manutauhuia. Haere, haere, haere atu rā.

Me mihi ki a tātou katoa ngā mōrehu, ngā mahuetanga iho o rātou mā e noho nei hei tauira mō ngā uri whakatupu arā, ko ō tātou tamariki, mokopuna, ngā rangatira o āpōpō. Tēnā koutou, tēnā koutou, tēnā rā tātou katoa me ngā mihi a Hine Raumati ki a tātou katoa.

Nau mai ki te putanga tuatahi a Kōkiritia mō te tau 2016. He tau hou, he whāinga hou. Kua whakahoungia anō hoki pea tātou i te pai o te wā whakatā i te taha o ō tātou whānau, hapū, iwi anō hoki.

I tēnei wiki, ka tū te huihuinga nui tuatahi a te maramataka Māori, arā, ko te rā whānau 143 o Te Māngai, o Tahupōtiki Wīremu Rātana ki te Pā o Rātana.

E 25 kiromita te tawhiti mai i Whanganui ki Rātana, otirā, kāore e kore ka waipuketia te pā e te tini i te wiki e whakanui ana i tōna whānautanga mai i te 25 o Kohitātea i te tau 1873. Ka eke pea te tokomaha o ngā tāngata ki te 15,000.

Ka tae petapeta atu ngā iwi ki te whakanui i tōna whakapono, ki te whiriwhiri kōrero hoki mō ngā take Māori o te wā. Ko te hunga rangatahi me te whakawhanaungatanga ngā aronga nui i tēnei tau.

Koia nei te tuatahi o ngā hui nui e rua, arā, ko te Rā o Waitangi te mea tuarua. Hei konei anō ka huihui ngā iwi ki te taha o tauiwi ki te whakaoho i te marea ki ngā take o te wā.

Ka whakaputaina e Te Puni Kōkiri tā mātou moheni, arā, ko Kōkiri 33 i te Rā o Waitangi. E rua ngā putanga o tēnei moheni i ia tau. Kei tēnei putanga a Kōkiritia ētahi o ngā kōrero mai i Kōkiri 33. Rēhitatia mai ināianei kia whiwhi koe i tētahi kape UTUKORE.

E mau ana te whakaputanga o te raumati ki ngā kōrero e whakanui ana i te whanaketanga o te Māori me ngā mahi a Te Puni Kōkiri kei raro i ā mātou kaupapa matua, arā, ko te Whakapapa, ko te Oranga, ko te Whairawa me te Whanaungatanga.

Kei te kōrero How the ‘Anias’ Got Their Way ngā whakamārama mō te whakatutukinga o te moemoeā o te whānau Ranga-Bidois, arā, ko te whakatūnga o tō rātou papakāinga.

Kei te uhi tētahi kōrero mō tētahi kaiwhakataetae motokā Māori, mō Faine Maniapoto Kahia me tana moemoeā nui, arā, kia riro i a ia te tūranga tuatahi i te whakataetae motokā o Bathhurst. I kōrero a Kōkiri ki a Faine nō muri mai i te whakataetae AsiaCup Series ki Marēhia i te tau 2015.

Kei te putanga o Kōkiri 33 hoki tētahi whakarāpopotanga mō Te Ture Whenua Māori me ngā kōrero mō te Pire Reo Māori.

Ka puta mai anō tētahi kape o Kōkiri i te wā o Matariki. Kāore e kore, ka nui anō ngā hua ka puta mai i te moheni a Kōkiri me te pānui ā-hiko a Kōkiritia i te roanga o tēnei tau.

Kia tau ngā manaakitanga ki runga i a koutou katoa.

Ngā manaakitanga, Michelle