Ko tō rātou tino hiahia kia tiakina te whenua mō ngā whakatipuranga o ēnei rā me ngā rā e tū mai nei. Ko tā rātou tono, kia wetekina ngā here ā-ture e aukati ana i te whanaketanga mai o ō rātou whenua.

 

Te whāinga

Ko te whāinga a te whakahoutanga o Te Ture Whenua Māori ko te whakamana i te whenua Māori hei taonga tuku iho, otirā, te waihanga me te whakahāngai i ngā ture hei tautoko i ngā momo mahinga whenua.

 

E toru ngā wāhanga o te whakahoutanga – ko te whakahāngai i te taha ture, ko te tautoko i ngā kaipupuri whenua me te whakapiki ake i ngā whakaputanga.

 

Te whakahāngai i te taha ture

Ko tā te taha ture:

• he whakamana i te whenua Māori hei taonga tuku iho
• he tautoko, he whakatairanga i te whenua Māori kia noho pūmau ki ngā kaipupuri hei whakamahi mā rātou
• he tuku i te mana whakahaere ki ngā kaipupuri whenua Māori kia wātea rātou ki te whai i ō rātou wawata mō te whanaketanga me te oranga pūmau o ō rātou whenua.

Te tautoko

Ko tā te ratonga tautoko:

• he tautoko i ngā whakatau a ngā kaipupuri whenua, he whakatairanga i te whai wāhitanga
• he whakahaere i ngā rārangi kaipupuri whenua Māori kia tika ai te whakatakoto, kia wātea hoki ngā pūranga kōrero ki te katoa
• he tuku pārongo ki ngā kaipupuri whenua, he kimi huarahi e ea ai ngā nawe ki waho atu o ngā kōti
• he whakamāmā i te rēhitatanga o ngā momo whakahaere whenua Māori.

Te whakapiki ake i ngā hua

Mā ngā whakahoutanga nei:

• ka rangona, ka whakatinanahia hoki ngā whakatau a ngā kaipupuri whenua Māori  
• ka nui ake ngā hua ka puta mai i te whakamahinga o te whenua Māori.

Te Ara ki te Pire mō te Ture Whenua Māori

1865

Ka whakatūria te Kōti Whenua Māori.

1873

Ka whakatūria te Kōmihana Whenua – hei tirotiro i ngā tukanga a te Kōti Whenua Māori.

1953

Te Ture mō ngā Take Māori.

Me mātua hoko atu ngā Māori i ō rātou whenua ki Te Tari o te Kaitiaki Māori mēnā kei raro te uara o taua whenua i te £25.

1975

Te Hīkoi mō te Whenua - he mea ārahi nā Kahurangi Whina Cooper,‘Not an acre more’.

Koia nei te pūtakenga mai o ngā ture whenua Māori hou.

1980

Te Kōmihana Karauna o te Kōti Whenua Māori.

Me whakahou ngā ture e pā ana ki te whenua Māori, waihoki, me whakawehewehe te taha ture me te taha whakahaere o te whenua Māori.

1983

Kaupapa: Te Wāhanga Tuatahi.

Ka whakatakotoria e te Kaunihera Māori o Aotearoa te kaupapa o Te Wāhanga Tuatahi, arā, ko te whakaūnga me te whakawhanaketanga o te whenua Māori hei tūāpapa mō te whakahoutanga o ngā ture e pā ana ki te whenua Māori.

1987

Ka whakatakotohia te Pire mō Te Ture Whenua Māori i te Whare Pāremata.

1993

Ka whakamanahia Te Ture Whenua Māori 1993

1996

Māori Land Investment Group.

He rōpū motuhake tēnei i rangahau i ngā huarahi e whai pūtea ai te whenua Māori. Ko tā rātou tono kia mātua tautokona ngā kaipupuri whenua Māori, kia whakaitia hoki te wāhi ki te Kōti Whenua Māori.

1997

Te arotakenga 5 tau o Te Ture Whenua Māori.

He mea whakatū tēnei arotakenga nā te Ture Whenua Māori 1993 kia kitea ai e pēhea ana te haere o te Ture. Ahakoa ka tautokona whānuitia te whakawhānuitanga ake o te mana whakahaere o ngā kaipupuri whenua, kāore te katoa o ngā panonitanga i whai wāhi ki Te Whakahoutanga o Te Ture Whenua Māori 2002.

1998

Māori Multiple Owned Land Development Committee.

He rōpū motuhake tēnei i tuku tono kia mātua tautokona ngā kaipupuri whenua Māori ki te whakawhanake mai i ō rātou whenua, waihoki, kia hāngai, kia tika hoki ngā pārongo katoa mō te whenua Māori.

 

 

1999

Kōti Whenua Māori.

Ka whakahoutia te taha whakahaere.

2000

Te Whakakīnga o ngā Āputa mō Aotearoa Whānui.

Ka whakanuia ngā momo tautoko mā ngā kaipupuri whenua Māori, ka whakatikaina hoki ngā pārongo mā ngā kaipupuri whenua..

2004

Te kaupapa o te Paetukutuku Whenua Māori.

Ka whakairihia ngā pārongo a te Kōti Whenua Māori mō ngā kaipupuri whenua Māori me ngā poraka whenua ki te ipurangi.

2005

Hui Taumata Māori Land Tenure Review Group.

Ka tāpae kōrero hei  tautoko i te whanaketanga mai o te whenua Māori, arā, kia mātua tautokona ngā kaipupuri whenua Māori, kia whakahāngaia ngā tukanga rēhita, waihoki, kia piki ake te mana whakahaere o ngā kaipupuri whenua Māori.

Te Pūrongo o te Tari o te Tumuaki o te Mana Arotake

Me whakapai ake te taha whakahaere o te Kōti Whenua Māori.

2011

Ngā Tūmanako o ngā Tāngata Whai Whenua Māori.

He rangahau motuhake e ui ana i ngā kaipupuri whenua Māori mō ā rātou whāinga tuatahi mō te whenua Māori. Ko te whakatau me whakahāngai te taha ture me ngā tukanga tautoko.

2012

Te Arotakenga o te Ture Whenua Māori.

E rima ngā whakahoutanga matua ka whakatakotohia e tēnei rōpū motuhake mō te taha ki te ture me te whakahaere o te whenua Māori. Ko te whakatau kia nui ake te mana whakahaere ki ngā kaipupuri whenua, kia ngāwari ake tō rātou tūhonohono ki te whenua me te whakamahi i tō rātou whenua. He mea nui anō kia tiakina te whenua.

2013

Ngā whakatau a te Rūnanga a te Kāwanatanga.

Ka whakaaetia ngā whakahoutanga a te rōpū arotake kia whakamāmāhia te whakamahinga o te whenua, ā, kia whanakehia mai te Pire mō Te Ture Whenua Māori.

2014

Ngā huihuinga a ngā iwi me te Karauna.

Ka whakatūria ngā huihuinga ā-rohe ki te whakamōhio atu i ngā whakahoutanga mō Te Ture Whenua Māori ki te motu.

2015

Ka whakatūria te Rōpū Tohutohu a te Minita mō Te Ture Whenua Māori.

Ko tā te rōpū nei, he tāpae kōrero motuhake mō te whakaputanga hukihuki o te Pire me te Ratonga Whenua Māori.