PĀNUI PĀPAHO | MEDIA STATEMENT

Te 14 o Mahuru 2018 | 14 September 2018

E hāpai ana a Te Puni Kōkiri i ngā hīkoi mō te reo

Kei te kaha tautoko a Te Puni Kōkiri i Te Wiki o te Reo Māori me ngā tini hīkoi e tū ana huri noa i Aotearoa i tēnei wiki, te kī a te Toihau, a Michelle Hippolite. Kei te tautokona, kei te whakahaerehia hoki rānei ngā kaupapa reo e te tokomaha o ngā kaimahi a Te Puni Kōkiri.

“He nui tonu ngā kaitaunaki o te reo e mahi ana ki Te Puni Kōkiri, arā, kei te tari matua me ngā tari ā-rohe. Kei te āwhina rātou i ngā whakahaere mō ngā hīkoi me ngā momo kaupapa o te wiki. Kei te tū ētahi hei kaitohutohu i ngā rori, hei kaitautoko rānei mō ngā whānau," te kī a Michelle Hippolite.

E rima ngā hīkoi e tautokona ana e Te Puni Kōkiri i Te Wiki o te Reo Māori i tēnei tau: ko te hīkoi ki Pōneke i te 10 o Mahuru, ko te hīkoi ki te pokapū o Tāmakimakaurau i te 13 o Mahuru, ko ngā hīkoi ki Manukau, ki Tūranga hoki i te rā nei, otirā, ko te hīkoi whakamutunga ki Rotorua i te Rātapu te 16 o Mahuru.

E hia mano ngā tāngata i puta mai ki te tautoko i ngā hīkoi mō te reo Māori. Hei tā Michelle Hippolite, koinei te tau tuatahi kua tū ētahi hīkoi nui ki waho atu o Te Whanganui-a-Tara.

“He hikinga ngākau ki te kite i te nui o te tautoko mō tō tātou reo, Māori mai, tauiwi mai, rangatahi mai, kaumātua mai anō. Kī tonu ngā tiriti i te rōreka o ngā reo waiata me ngā haka a ngā tamariki. Ānō te ātaahua o te hīkoi ngātahi a te rau tangata, nō ngāi tāua, nō ngāi tauiwi hoki, i raro i te kaupapa kotahi, arā, ko te whakatairangatanga o te reo Māori huri noa i Aotearoa," te kī a Michelle Hippolite.

Ko te kaupapa o Te Wiki o te Reo Māori i tēnei tau ko 'Kia Kaha te Reo Māori.' He kupu whakaaraara tēnei hei hiki i te kōrerotanga o te reo ahakoa ki hea, ahakoa te kaupapa. Hei tā Michelle Hippolite, he rite tonu taua wawata ki tērā o ngā uara me te whāinga roa a Te Puni Kōkiri.

“Otirā, e tika ana hoki kua whakaputaina atu te tauira o te Rautaki Reo Māori a te Karauna, arā, ko Maihi Karauna i tēnei wiki. Koinei te rautaki e whakatakoto ana i ngā mahi a te Karauna hei tautoko i te whakapakaritanga me te oranga pūmau o te reo Māori i tō tātou whenua. E wātea ana te motu whānui ki te tuku i ā rātou tāpaenga kōrero mō te tauira rautaki tae noa ki te mutunga o tēnei marama."

Tirohia ētahi atu kōrero ki tpk.nz/maihikarauna

Hei tā Ms Hippolite, "Nō mātou te hōnore ki te tautoko i ngā momo kaupapa, pērā i ngā hīkoi mō te reo Māori, e hāpai ana i te reo Māori hei reo kōrerorero o ia rā i tō tātou whenua. Kia kaha te reo Māori!"

KUA MUTU

Whakapā atu ki: Nicky Birch 027 762 7293 bircn@tpk.govt.nz.