"Me mihi te Kaunihera o Pōneke i tō rātou māia ki te whakamana i te reo Māori hei reo kōrero i te tāone matua o Aotearoa," te kī a te Toihautū a Te Puni Kōkiri, a Michelle Hippolite.
Published: Rātū, 20 Huitanguru, 2018 | Tuesday, 20 February 2018
"Kei te whakatairangahia tō tātou reo taketake e te tāone matua o Aotearoa, he tohu nui tēnei ki a tātou o Aotearoa, otirā, ki rāwāhi hoki. Ka rawe."
Nō tērā marama, ka whakarewaina e te Kaunihera o Pōneke tā rātou tauira kaupapa here mō te reo Māori, arā, ko Te Tauihu – Te Kaupapa Here Huikihuki Te Reo Māori, hei tirotiro mā te rohe whānui. Ka kapi ngā whakawhitinga kōrero mō te tauira rā ā te 12 o Poutūterangi 2018.
"He reo ora te reo Māori mā ngā iwi katoa o Aotearoa. Me kite, me kōrero, me rongo te reo i ngā pakihi, i te ao hākinakina, i ngā mahi toi, i te rāngai kāwanatanga, i te toa hokomaha, i runga anō i te pahi.
"Me nui ake ngā tāngata e kōrero Māori ana, ahakoa kei hea", tana kī.
"I tērā tau, ko Rotorua te tāone nui tuatahi ki te tū hei tāone reorua, nā, kei te whai atu Te Whanganui-a-Tara i a rātou. Kei te kuhu atu hoki ngā tāone o Te Wairoa me Ōtaki ki te kaupapa. Hīkaka katoa au ki te kite i ngā tāone ka whai i a rātou.
"E rua, nui atu rānei ngā reo o te nuinga o ngā iwi o te ao, waihoki ko ngā tāngata e noho ana i ngā tāone matua o te ao. He tāone whakahirahira tēnei. Me eke hoki tātou ki tērā taumata."
Ko Te Puni Kōkiri tētahi o ngā kaiarahi o te whakarauoratanga o te reo Māori e mahi ngātahi ana ki ngā tari kāwanatanga. Kei te whakatūria e mātou te kaupapa o Maihi Karauna, arā, ko te rautaki kāwanatanga e hāpai ana i ngā kaupapa here me ngā mahi e pā ana ki te whakarauoratanga o te reo Māori, ināianei, ā ngā rā kei te heke mai hoki.
"Ka mahitahi Te Puni Kōkiri ki ngā whānau me ngā hapori mō ngā kaupapa ā-rohe me ngā kaupapa ā-motu e whakarauora mai ana i te reo matua ā-ture o tēnei whenua."
Hei tā Mrs Hippolite, he mahi whai kiko ngā kaupapa kei roto i te tauira rautaki a te Kaunihera hei hāpai i te reo Māori.
"Mā ngā pānui reorua ka kitea te reo ki te tāone nui. Ka whakarauoratia anō hoki ngā kōrero o mua i te whakahokinga mai o ngā ingoa wāhi. Ki te whakarauorahia ēnei ingoa, ka ora hoki ngā kupu, ngā tūtohu whenua, te whakapapa, ngā tikanga me te mātauranga pūtaiao o mua."
I tērā tau, i whakaputaina te puka o Māori-English Bilingual Signage hei āwhina i ngā mahi whakarauora reo Māori.
"He mea whakahirahira tēnei whakaaro nui o te Kaunihera me ngā tāngata o Pōneke" te kī a Mrs Hippolite.