Heoi, anei anō ētahi o aua whakatutukitanga ko te whakarewatanga o te Whenua Māori Fund, te tuatahi o ngā hui ā-rohe mō ‘He kai kei aku ringa’ ka tū ki tēnā pito, ki tēnā pito huri noa i te motu, te pānuitanga tuarua o te Pire Reo Māori (Māori Language Bill), tae atu ki te haere o Te Ture Whenua Māori Bill me te Māori Housing Network.

 

Te Ture Whenua Māori

Hei wāhanga o te hanganga hou whānui o Te Ture Whenua Māori, nāku te Whenua Māori Fund i whakarewa i te marama o Huitanguru. Mā ngā kaipupuri whenua Māori tēnei pūtea hei tuhura āhuatanga e whakapiki ai i ngā hua ka puta i te whenua, mā te huri i te āhua o tā rātou whakamahi i tō rātou whenua, mā te whakapiki huanga rānei.  

Ka taea hoki tēnei pūtea te whakamahi hei aromatawai i te āheinga ki te whakamahi i te whenua, ki te tuhura i te torohū/te putanga huanga me te tautohu i ngā tikanga pai ake hei whakahaere i te whenua. Kei te tuwhera ngā tono ināianei, kei tēnei putanga tonu o Kōkiritia ngā kōrero e pā ana ki tēnei kaupapa.

I whakatakotoria he tuhinga hukihuki hou o Te Ture Whenua Māori Bill ki te aroaro o ngā hui whakamōhio i tū huri noa i te motu. Ko te take o tēnei huringa o te wānanga ko te whakamārama i ngā panoni matua ki te Pire. He wāhi anō tēnei kia wānangahia te hōtaka hanganga hou whānui tae atu ki te whanaketanga o te Māori Land Service, ngā whakatau ki ngā wāriutanga me ngā whakataunga mō te whenua Māori, tae noa ki te whakatuwheratanga o te Whenua Māori Fund.

Mai anō ngā tino aronga e rua o te hanganga hou o Te Ture Whenua Māori: kia māmā ake te wāhi ki ngā kaipupuri whenua Māori ki te whakatau i ō rātou ake whakaaro e pā ana ki te kāwanatanga me te whakamahinga o tō rātou whenua, me te tiaki i te tūnga o te whenua Māori hei taonga tuku iho. Ka kitea te putanga hukihuki o te Pire ki te paetukutuku o Te Puni Kōkiri.

Te whakakaha ake i te Ohanga o Tākitimu

I te taha o te Ministry of Business, Innovation and Employment, Ngā Kaitohutohu Rawa o Aotearoa arā ko te Treasury, te Callaghan Innovation, te New Zealand Trade and Enterprise, me te Manatū Ahu Matua arā ko te Ministry for Primary Industries i whakatū a Te Puni Kōkiri i te tuatahi o ngā hui ā-motu e waru o He Kai Kei Aku Ringa ki Ahuriri. Nā runga i te mahi ngātahi me Ngāti Kahungunu i tū ai te hui ‘Whakakaha ake i te ohanga o Tākitimu’. Kei ngā whakaaturanga te kōrero mō te āheitanga o te rautaki ā-motu mō te whanaketanga ohanga Māori, arā, He Kai Kei Aku Ringa ki te tautoko i te whanaketanga ohanga ā-rohe, he wāhi anō hoki kia puta ngā kōrero pūrākau a ngā tāngata o te rohe.

Kua awe taku ngākau i tētahi o ngā uri o Ngāti Kahungunu, a Melissa Raharuhi me tana pūrākau mō te tango moni āwhina hei ako i te mahi rorohiko whakawhanaketanga tukutuku ki te Enspiral Def Academy. Nā konā i angitū ia i tana whiwhinga mahi i te kamupene ICT nui rawa atu o te whenua, ko Datacom.

 

Te Pire Reo Māori

Kua tata tonu te whakaturetanga o te Pire Reo Māori (Te Reo Māori) nō te hipanga o tōna pānuitanga tuarua ina noa nei ki te Whare Pāremata. He tuatahitanga tēnei, arā, ko te whakaturetanga o tētahi Pire ki ngā reo e rua ko te reo Māori me te reo Ingarihi, ina ka puta he tohe i waenga i ngā kape e rua ka whāia te whakaputanga reo Māori.

Kua roa te huarahi mai i te wā i whakatakotoria te Māori Language Bill i te tau 1987 e te Minita Take Māori o mua, a Hōnore Koro Wetere. I wāhi ai te kōrero i a Minita Wetere ki te mihi kātahi ka pahū mai ngā kōrero whakahē o te whare. I te mea he Pire tēnei e whakature ana i Te Reo Māori hei reo whai mana, me mihi ka tika; heoi, ko te tau 1987 tērā – te tau o te rū i Edgecumbe, te tau i kīia ai he rohe karihi-kore a Aotearoa, me te tau i toa te Kapa Ōpango i te whakataetae tuatahi mō te Kapu Whutupōro o te Ao. Kāore he wāhi ki te reo Māori i te ‘reo kiwi’ o aua rā, he rerekē taua āhua i ēnei rā. Kua tino parangia te huarahi mai i te tau 1987 i te mahi whakaora reo Māori, heoi anō tā te Pire he tautohu he mahi nui tonu anō kei te tū mai nei.

 

He Papakāinga

Nō muri tata nei i whakatuwheratia e Te Ātiawa tō rātou papakāinga hou ki Akau-tangi arā ko Evans Bay i Pōneke. Nōku te whiwhinga i riro i a au te mahi whakatuwhera i te papakāinga, 14 ōna whare hou. He whakaaturanga te papakāinga o Te Aro Pā i te āhei o te Māori ki te waihanga i ō rātou ake rongoā ki ngā raru whare. E harikoa ana ahau e tautoko ana te Māori Housing Network i ngā whānau mā te tohutohu i a rātou ki ngā pūtea tika hei tono mā rātou, ka mutu kei te tuku tohutohu, mōhiohio hoki me te tautoko ā-mātanga mō te whakapai ake i tō rātou raruraru whare te take.

 

Arā noa atu ngā kaupapa pēnei huri noa i te motu. Mā te wā anō tātou e wānanga ai ēnei momo pūrākau ki ngā putanga e tū mai nei o Kōkiritia.