Kei te mihi ngā ratonga pāpori o Te Tai Tokerau i te Minita Tuarua o te Whanaketanga Māori, i a Willie Jackson, i tana tuku pūtea ki tētahi kaupapa hou mā ngā taiohi o Te Tai Tokerau. I whakarewaina te kaupapa ki Kaikohe i tēnei wiki.

I tae atu a Mr Jackson (ko ia anō te Minita mō ngā Take Mahi ) ki te raki i raro i te kaupapa o He Poutama Rangatahi ki te whakarongo ki ngā mōhiotanga me ngā wawata o te hapori mō ngā rangatahi. He rautaki kāwanatanga a He Poutama Rangatahi, e āwhina ana i ngā taiohi ki te kimi mahi.

Ka whakarewaina e Mr Jackson te kaupapa o Taiohi Ararau – Passport to Life, he hōtaka e tautoko ana i ngā taiohi 15 – 24 ngā tau, kāore i te whiwhi penihana, kāore i te mahi, i te whai mātauranga, i te whakangungua rānei mō tētahi mahi. Mā taua hōtaka ka āhei ngā taiohi ki te whiwhi i te tiwhikete whānautanga, i te pūtea pēke, i ngā momo raihana hautū waka me tētahi nama tāke.

Kei te mahi te Kāwanatanga i te taha o ngā kaihāpai o te hapori, arā, ko Te Kotahitanga E Mahi Kaha Trust i Kaikohe, ko te rōpū o He Iwi Kotahi Tātou Trust i Moerewa, Ko Te Hau Āwhiowhio o Ōtāngārei i Whāngārei me te Waitomo Papakāinga Development Society Incorporated i Kaitāia ki te whakatutuki i te kaupapa.

Ka mihia te Minita e ngā ratonga pāpori rā ki Te Uma o Te Kona Youth Space, i tōna kaha ki te kite i ngā raruraru e hāngai ana ki ngā hapori kei tuawhenua, me te whakaaro nui o te hōtaka ki ngā whānau Māori.

Hei tā Mr Jackson, ko te mahi a te tauira hou nei, he tautoko i ngā taiohi Māori ki te kimi i te oranga ā-pūtea, ki te kimi hoki i te oranga pūmau mā rātou. "Mēnā ka tāpekehia te nui o ngā tau e mahi ana ngā ratonga pāpori katoa ki tēnei rohe, ka hipa taua nama i te 100 tau. Kei konei te tokomaha o ngā Māori kore-mahi i Aotearoa. Kei te mihi au i ā rātou mahi me tō rātou kaha ki te whai i te oranga pūmau mō te rohe. Koia nei te wā tika ki te whakatū i tēnei kaupapa.

He kaupapa ā-whānau a Taiohi Ararau: Passport to Life, arā, ka ākina ngā taiohi ki te mahi ngātahi ki ō rātou whānau kia tautokona ngā taiohi ki te whakatutuki i ā rātou whāinga.

Kei raro i te Tahua Pūtea o te tau 2017, e $4 miriona te nui o te pūtea i tukuna ki te kaupapa o Taiohi Ararau: Passport to Life i roto i ngā tau e whā. Nā Minita Jackson te $8 miriona anō i whakawhiwhia ki te kaupapa hei hāpai i ngā mahi ā-whānau, i ngā ratonga pāpori me ngā tari ā-rohe o Te Puni Kōkiri ki te tautoko i ngā taiohi ki te kimi mahi pūmau.

"He mea nui ki a au, me whai ngā rangatahi i ngā ara tika ki te mahi, arā, me whai pūkenga, me kite hoki i ngā tūmomo huarahi e wātea ana ki a rātou," te kī a Minita Jackson.

KUA MUTU

Whakapā atu ki a:

Karen Tasker, Kaitohu Tōmua ki Te Puni Kōkiri

taskk@tpk.govt.nz

027 226 4245