Kua mana te reo Māori i Aotearoa nei nō te tau 1987, mai i taua tau e hia kē ngā mahi whakaora reo Māori kua puta mai pērā ki te kōhanga reo, ngā kura kaupapa Māori, te whakatūria te kōmihana mō te reo Māori a Te Taura Whiri i Te Reo Māori, ngā reo irirangi Māori i roto i ngā tau tata ake nei ko Whakaata Māori.

I tōna kauhau tuatahi i te tīmatanga o tēnei tau i puta i a ia te urupounamu mēnā he mahi anō e taea ana kia pai ake te tūnga o te reo Māori hei reo kōrero noa o ia rā, o ia rā i Aotearoa.

I āta kōrerotia e te tumuaki hou o te wāhanga Māori i Te Whare Wānanga o Te Upoko o te Ika a Ahorangi Higgins te hekenga o te maha o ngā kaikōrero matatau ahakoa te nui o ngā tau e whakapau kaha ana tātou ki te whakaoranga o te reo.

I te Tatauranga 2013, kotahi i te rima Māori i kī ka taea e rātou te kōrero Māori, engari i te tatauranga o mua he kotahi i te whā, nō reira te āhua nei kāore ngā rautaki o ēnei wā i te mahi.

Ahakoa kua whakapau kaha ki te whakaora reo ki te taumata whāiti nei, arā, ki ngā kāinga, ki runga marae, ki roto i ngā whānau, he mahi atu anō pea e taea ana i te taumata whānui ake kia mōhiotia ai ehara te reo Māori i te reo whaimana noa, engari he reo whaihua ā-ōhanga kē hoki ki a Aotearoa.

Ko tāna ka ahu mai te hiahia kia kōrero Māori i te uara ka utaina ki runga i te reo e tēnā, e tēnā tangata, oti rā e te iwi whānui hoki.

“He tino taonga te reo hei tautoko i te ōhanga o Aotearoa, tae atu ki ngā mahi tāpoi me ētahi atu mahi ōrite anō. Ehara i te mea me tino matatau ngā tāngata katoa, engari kia whakaae noa mai he āhuatanga ahurei te reo Māori ki te tuakiri o Aotearoa.” te kī a Tākuta Higgins.

I mutunga o ngā mahi whakanui i Te Wiki o te Reo Māori, me ana whakamaharatanga 40 tau, kua harikoa katoa Te Taura Whiri i te Reo Māori i te whānui o te tautoko mō te reo Māori puta noa i te whenua.

Ko te putanga hoki o tētahi whakatipuranga rangatahi e ngākaunui ana ki te reo Māori tētahi o ngā tino āhuatanga o Te Wiki o te Reo Māori i tēnei tau.

I whakaputaina e tētahi akonga o Kapiti a Finnian Galbraith he kauhau e inoi ana ki a Aotearoa ki te manaaki i te reo Māori me tōna tūranga ahurei i te tautuhinga i te hītori o te tuakiri o tō tātou whenua. I muia te ataata huri noa te motu, puta noa hoki te ao.

E ai ki te Toihau o Te Taura Whiri, a Tākuta Wayne Ngata mā te ngākaunui a te tangata takitahi ki te reo e mātua whakarite i te oranga o te reo, he tohu pai tēnei āhuatanga i ēnei rā o te huringa mai o Aotearoa ki te reo Māori.

“Kua kitea i Te Wiki o te Reo Māori i tēnei tau te momo kaingākau, te whai wāhitanga mai hoki i kitea i ngā tau 10 kua hipa ake nei,” tana kī.

“Kia ora ai te reo Māori e tika ana kia manaakitia ki ngā tino taumata whānui.  Kua whakaaturia e Aotearoa kua rite ia ki te manaaki i te reo Māori, me pērā hoki te Pirimia.”

 

[Read more]