"Kei te whakahīhī au i te whakatūnga o tēnei papakāinga. Kei te kaha mātou ki te mahi ngātahi ki ngā hapori, ki ngā tari kāwanatanga me ngā whakahaere ā-rohe ki te tautoko i ngā wawata o ngā iwi me ngā rōpū Māori," ko tā te Manahautū Tuarua, Te Puni Hononga ā Rohe, a Di Grennell mō te whakatūwheratanga o te papakāinga hou mō ngā whānau i pā kinotia e ngā waipuke ki Edgecumbe.
Published: Rāmere, 20 Paengawhāwhā, 2018 | Friday, 20 April 2018
Kei te whakanui te Manahautū Tuarua o Te Puni Hononga ā-Rohe a Te Puni Kōkiri, a Di Grennell i te whakatuwheratanga o tētahi papakāinga hou hei wāhi noho mō ngā whānau kāore anō kia kite i tētahi kāinga mō rātou kotahi tau i muri mai i ngā waipuke ki Edgecumbe.
I tēnei rangi, i tae atu a Ms Grennell ki te karakia whakatuwhera mō ngā whare e rima ki te marae o Kōkōhīnau e 5km ki te tonga o Edgecumbe. E rua ngā rūma moe o ia whare.
"Koa katoa ahau kua tutuki te wāhanga tuatahi o te papakāinga o te marae o Kōkōhīnau. Kua rite ngā whare, ākuanei ka hūnuku mai ngā whānau. Me mihi au ki te rōpū kaitiaki me te kōmiti o te Marae – i tō koutou kaha ki te manaaki, ki te ārahi, ki te ū hoki ki te kaupapa. He haumaru, he mahana ngā whare nei, he māmā te utu mō ngā whānau i tēnei rohe. Me whakahīhī koutou i te whakatutukinga o tēnei kaupapa i te rā nei," te kī a Ms Grennell.
E 80 ngā whānau i whakaputaina i ō rātou whare i muri mai i ngā waipuke o Edgecumbe. Kātahi ka whakatutuki wawe te Māori Kōmiti o Pahipoto i ā rātou whakaritenga mō tēnei papakāinga hei āwhina i ngā whānau i pā kinotia e te waipuke.
Kotahi piriona e toru rau mā waru miriona te nui o te pūtea i tukuna e Te Puni Kōkiri me te Ministry for Business, Innovation and Employment hei whakamāmā i ngā utu mō tēnei papakāinga.
E hāpai ana taua pūtea i ngā momo hanganga e tū ai ngā whare. Tekau mā iwa te katoa o ngā whare, e rima ngā whare i te wāhanga tuatahi. E rua ngā rūma moe o aua whare.
Ahakoa kei te hiahiatia tonu ngā whare taupua e ētahi, he whare ēnei mō ngā whānau i pāngia e te waipuke. Ka heke te nui o ngā whānau e kimi whare ana, ka huri ēnei hei whare kaumātua.
Kei te mihi a Di ki te Ministry of Business, Innovation and Employment, ki te Kaunihera ā-Rohe o Whakatāne, ki te Kaunihera ā-Rohe o Te Moana a Toi me Easy Build, "Kua tutuki te wāhanga tuatahi o te papakāinga. Kei te hiahia au ki te mihi ki te katoa i tō rātou ngākau nui ki te kaupapa tae noa ki tēnei wā. He tohu nui te whakatutukinga o te kaupapa o tō rātou kaha ki te mahi ngātahi ki te whakatū whare mō ngā whānau," tana kī.
"Kei te whakahīhī au i te whakatūnga o tēnei papakāinga i raro i te Māori Housing Network o Te Puni Kōkiri. Pērā i te papakāinga o te marae o Kōkōhīnau, kei te kaha mātou ki te mahi ngātahi ki ngā hapori, ki ngā tari kāwanatanga me ngā whakahaere ā-rohe ki te tautoko i ngā wawata o ngā iwi me ngā rōpū Māori."
KUA MUTU
Hinerangi Barr
Kaitohu Tumuaki Communications Principal
04 819 6000
027 504 5773
barrh@tpk.govt.nz