"Nā te whakatuwheratanga o te tari hou o Te Upoko o te Ika ki Porirua ka whānui ake te toro atu a Te Puni Kōkiri ki ngā whānau i Te Tai Hau-ā-uru," te kī a te Tumu Whakahaere ā-Rohe, a Willis Katene.
"Kei te koa katoa mātou ki te whakatū i tētahi tari hou i te rohe whakahirahira o Porirua – me kī, kei te manawa o te rohe o Te Upoko o te Ika," tana kī
Published: Rāhina, 19 Poutūterangi, 2018 | Monday, 19 March 2018
"Nā te whakatuwheratanga o te tari hou o Te Upoko o te Ika ki Porirua ka whānui ake te toro atu a Te Puni Kōkiri ki ngā whānau i Te Tai Hau-ā-uru," te kī a te Tumu Whakahaere ā-Rohe, a Willis Katene.
"Kei te koa katoa mātou ki te whakatū i tētahi tari hou i te rohe whakahirahira o Porirua – me kī, kei te manawa o te rohe o Te Upoko o te Ika," tana kī
"E tū pātata ana tēnei tari ki te huarahi matua, he māmā noa te toro atu ki ngā hapori Māori o te rohe whānui o Te Upoko o te Ika, tae atu ki te tāone o Te Awahou."
Nui atu i te 20 tau te tari o mua e tū ana ki Te Awakairangi. Hei tā Willis, ka ū tonu ngā hononga a ngā kaimahi ā-rohe ki taua takiwā.
"He mea nui ō mātou hononga ki ngā whakahaere Māori, ki ngā pakihi me ngā whānau i Te Awakairangi. Ka ū tonu aua hononga mai i tō mātou wāhi hou," tana kī.
Kei te kapi te tari o Te Upoko o te Ika i te rohe whānui o Te Whanganui-a-Tara, nā reira e tika ana me noho te tari ki te pokapū o te rohe, e pā tata ana ki te rohe whānui.
"Kei te hiahia mātou ki te haere huri noa i te rohe, ki te toro atu ki ngā tāngata e kore pea e taea te haramai ki a mātou."
Ka whakatuwherahia te tari hou ki 12 Hagley St i tēnei ata. Kei reira hoki te tari o te Manatū mō ngā Iwi o Te Moana-nui-a-Kiwa.
Koia te whare tuarua e noho ngātahi ai Te Puni Kōkiri me te Manatū mō ngā Iwi o Te Moana-nui-a-Kiwa. I whakatuwherahia te tari tuatahi ki Tāmaki Makaurau i te mutunga o tērā tau.
Ka tū te pōwhiri i te 2pm i tēnei rā. Ka kauhau te Minita Whanaketanga Māori, a Nanaia Mahuta rāua ko te Minita mō ngā Iwi o Te Moana-nui-a-Kiwa, arā, ko Aupito William Sio. Ka tae atu te Koromatua o Porirua, a Mike Tana rātou ko ngā kanohi mō ngā iwi o Ngāti Toa Rangatira me Te Ātiawa.
Ko te rohe o Te Tai Hau-ā-uru tētahi o ngā rohe e ono o Te Puni Kōkiri. E ono ngā tari o tēnei rohe, arā, kei Whakatū, kei Papaioea, kei Taranaki, kei Taumarunui, kei Whanganui me Porirua. Kei Te Whanganui-a-Tara te Tari Matua o Te Puni Kōkiri.