Ka pūmau te whanaungatanga i waenganui i tētahi hapori i te whakatūnga o tētahi papakāinga hou ki tētahi marae i Ōtautahi, te kī a te Tumu Whakahaere ā-Rohe o Te Puni Kōkiri ki Te Waipounamu, a David Ormsby.
Published: Rāmere, 02 Poutūterangi, 2018 | Friday, 2 March 2018
"Neke atu i te tekau tau Te Rūnanga o Ngā Maata Waka me te hapori o Aranui e whakapau kaha ana ki te whakatutuki i tēnei kaupapa. He hikinga ngākau ki te kite i ngā whānau e noho āhuru ana i ngā kāinga mahana. He kāinga haumaru ēnei, he maroke hoki ā-roto.
"He māmā noa iho te whakatū whare, engari anō te whakapūmau i tēnei mea te whanaungatanga," tana kī.
E toru ngā whānau e noho ana i roto i ngā whare e ono i tēnei wā. Kei Aranui, kei te marae ā-iwi o Ngā Hau e Whā ēnei kāinga e tū ana. E toru ngā rūma moe o ia whare. He whare tauwhiro ēnei, e manaakitia ai te tangata mō te wā poto.
Hei tā te Tumu Whakahaere o te marae, hei tā Norm Dewes, ko te whakatinanatanga tēnei o te moemoeā o te marae, arā, kia tū te marae mō ngā iwi katoa, mō ngā tāngata katoa, nō ngā whenua katoa, ehara i te mea ka tū motuhake mō te iwi kotahi.
Kei te whakanui mātou i ngā iwi o tēnei hapori whakahirahira. Kei konei ngā kaumātua e whakatipu ana i ā rātou mokopuna, ko ngā mauhere wāhine e hoki mai ana ki te pāpori, ko te hunga hauā rātou ko ngā kaumātua.
"Kei te mōhio mātou ki a rātou. Kua āta kōwhiria te hunga e tika ana mō tēnei wāhi. Ki te kore ō rātou kāinga, me noho mai rātou ki konei mō tētahi wā. He tīmatanga pai tēnei mā rātou" tana kī.
Ko Jeanette Campbell tētahi o ngā kaimahi o te marae, ko ia anō te kaiwhakahaere o ngā whare nei. Kei te noho rātou ko tana mokopuna (e rima ōna tau), ko tana pāpā hoki ki tētahi o ngā kāinga.
"Kei te koa katoa taku mokopuna. He wāhi pai tēnei mō te tamariki. He marae ora tēnei. Kei konei tētahi o mātou i ngā wā katoa. Kei te whakatū mātou i tētahi papakāinga e rangona ai te whanaungatanga i waenganui i a mātou."
Ka āhei ngā kainoho ki te kimi āwhina i ngā tūmomo ratonga pāpori e tū ana i te papakāinga, arā, ko te mahi tiaki pūtea, ko ngā akoranga mō te whakatipu tamariki me te raihana motukā.
Koia te papakāinga tuatahi i Te Waipounamu kua whakatūria e te pūtea a te kāwanatanga i ngā tau maha. He mea tuku te $3.097 manomano tāra hei utu i te whakatūnga o te papakāinga e Te Puni Kōkiri, e Housing New Zealand Corporation me te Rātā Foundation. Kotahi miriona, e rima rau, e whā tekau mā whitu mano tāra te nui o te pūtea i tukuna e Te Puni Kōkiri mā te Māori Housing Network.
