Ko te pae tawhiti, whāia kia tata. Ko te pae tata, whakamaua kia tina.

I tērā marama, i whakatakotoria ki te pāremata e Hōnore Te Ururoa Flavell ngā puka mahere, ngā puka noho haepapa hoki a tōna Minitatanga – He Takunetanga Rautaki 2015-19 (arā, ko te Strategic Intentions 2015-2019), me te pūrongo ā-tau, arā, ko te Annual Report 2015, me te pūrongo, arā, ko te Minister’s Report in relation to Non-Departmental Appropriations 2015 – ko te wā tuatahi tēnei hei Minita Whanaketanga Māori, hei Minita Whānau Ora hoki.

 

Ahakoa ka whakakapi te Pūrongo-ā-Tau me te Pūrongo a te Minita i ngā whakatutukinga mō te tau mutu ai i te 30 o Pipiri 2015, ko tā He Uru Whetū, He Ara Haere: He Takunetanga Rautaki 2015-2019 ko te whakaatu i te aronga whāinga mō ngā tau e whā e haere mai nei.

Ka whakatakoto tā mātou puka He Takunetanga Rautaki i ngā wāhanga hua hou e whā e whakaritea ai e Te Puni Kōkiri tāna mahi, arā, ko te: Whakapapa, Oranga, Whairawa, me te Whanaungatanga.

Ka taea e koe te pānui kōrero kei tā mātou paetukutuku mō ētahi o ā mātou mahi e tuku tāpaetanga ana ki ēnei hua.

I tērā marama i whakarewaina te Māori Housing Network i te whakatūwheratanga o te papakāinga o te whānau Ranga-Bidois i Ngāruawāhia. Ka tautoko te whatunga i ngā kaupapa me te ārahitanga o nāianei i te rāngai whare Māori mā te tuku pārongo, tohutohu, mahi-ā-ringa hoki hei whakatupu āheinga. Ka whakahaere hoki i ngā moni hei tautoko kaupapa e pai ake ai ngā hua noho whare mō ngā whānau Māori.

I whakapaohotia e te Minita Whanaketanga Māori, ko Minita Hōnore Te Ururoa Flavell, me te Minita Whakawhitiwhiti Kōrero, ko Hōnore Amy Adams, ngā kopoutanga e tokowaru ki Te Rōpū Tohutohu Mātanga Pūtea Hangarau Pārongo Whakawhitiwhiti Kōrero Māori, arā, ko te Māori ICT Development Fund Expert Advisory Group.

Ka tuku tūtohu te rōpu tohutohu ki a Minita Flavell ka pēhea te whakangao i te Pūtea Hangarau Pārongo Whakawhitiwhiti Kōrero Māori, arā, ko te Māori ICT Development Fund. Whakaputahia ō whakaaro ki ngā awheawhe huri noa i te motu i tēnei marama. Haere ki Rauika mō ētahi pārongo anō, mō ngā rā me ngā wāhi.

I whakaāe te Rūnanga Kāwanatanga ki ngā panonitanga a te Minita Whanaketanga Māori ki te Pire mō Te Reo Māori.

Ka whai wāhi ēnei tono matua i whakaaetia ai e te Rūnanga Kāwanatanga ki:

• te whakamana ā-ture i ngā Rautaki Reo Māori e rua, arā, ko tētahi kia noho haepapa te Karauna e hāngai ana ki ngā take ā-motu, ā, ko tērā atu kia noho haepapa ngā iwi Māori, a ngāi Māori hoki e hāngai ana ki ngā take a te hapori;
• ngā haepapa matua o Tē Mātāwai, arā, ko te tautoko i te whānau, te hapū, te iwi me ngā hapori, ki te whakaāhei hoki i a rātou ki te whakaawe i ngā mahi a te kāwanatanga ā-motu;
• te panoni i te mematanga o Te Mātāwai kia hua ai te tū hei māngai mā ngāi Māori e noho tāone ana, ki te tautoko hoki i tā Te Puni Kōkiri tūāpā i te tukanga whiriwhiri;
• te pupuri tonu i te Taura Whiri me Te Māngai Pāho hei Hinonga Karauna; me
• te whakatū kia rua ngā wānanga kāwanatanga, mahi tahi hoki i waenga i Te Mātāwai me te Karauna.

Ki te whakaaro o Minita Flavell ka whakamanahia tēnei Pire hei te tīmatatanga pea o 2016.

Hei te tīmatanga o 2016 hoki ka hiahia a Minita Flavell ki te whakatakoto i te Pire Hukihuki mō te Whenua Māori ki te Whare Paremata. Ā tērā wiki ka tū tētahi hui kōhukihuki a Te Taraipiunara o Waitangi e pā ana ki te panoni i Te Ture Whenua Māori. Ka taea e koe te pānui kōrero mō ngā mahi kua mahia tae noa mai ki tēnei wā ki tā mātou pae tukutuku.

Ka hāpai tonu a Te Puni Kōkiri i tana mahi hei tari kāwanatanga noho haepapa mō te Whānau Ora. Ki te hiahia kōrero anō koe mō tēnei kaupapa, pānuitia ngā Frequently Asked Questions, ā, ki te hiahia rānei koe te whiwhi i ēnei ratonga, whakapā atu ki te pokapū whakamahi, arā, ko te Commissioning Agency e tata ana ki a koe.

He hinonga iti a Te Puni Kōkiri, he hinonga e ārahina ai e te kaupapa here hoki, ā, he nui te mahi hei mahi. Ka āta whakaaturia i tō mātou puka He Takunetanga Rautaki tō mātou tūnga ārahi i te Kāwanatanga mō ngā take huhua e pā ana ki te whanaketanga Māori. Waihoki me hanga tonu e mātou ka tika ngā hononga mahi kaha me Tari kē, me pokapū kāwanatanga kē, me ngā pokapū tautoko ki te whakapai ake i tā rātou whiwhi hua mō ngāi Māori. Inā hoki, me mōhio tonu mātou ka mau tonu i aua pokapū te haepapa mō te kōkiri kaupapa here, mō te tuku ratonga i te nuinga o ngā rāngai.

Ka āta mahia ā mātou mahi, ka uru atu ina kei a mātou te mana, te awe ikeike rānei, ka taea rānei e mātou tētahi panoni motuhake te whakahua. Mā ngā hua ikeike e whā – arā, ko te Whakapapa, ko te Oranga, ko te Whairawa me te Whanaungatanga – e hāngai ai tā mātou titiro whakamua ki ngā pae, ki te tauākī tūtoro hoki o te iwi, o te hapū me te whānau kia angitu hei Māori.

 

Paimārire

Michelle Hippolite

Toihautū | Chief Executive