He ihu oneone a Hohaia, kei te mōhio anō a ia me whai pūkenga te kaimahi kia eke tana utu ki ngā taumata tiketike.

“I te tīmatanga, he tauhou au ki ngā āhuatanga katoa o te ao mahi, nā, he tino āwhina ngā momo akoranga katoa ki a au. He hikinga wairua hoki,” te kī a Hohaia.

Nō tana tīmatanga ki AWF, he raihana motukā ā-tuhi noa iho tāna, engari, mai i taua wā, kua riro i a ia tana raihana tūturu me ētahi atu tohu mahi.

Kua whakawhiwhia ia ki ngā momo tiwhikete mahi, pērā i te Site Safe, i te Heights Safety, i te Elevated Working Platforms me te tiwhikete tuatahi mō ngā mahi ki runga tīrewa.

I tino puta te ihu o Hohaia i tōna kaha ki te whai i ngā momo akoranga a te hōtaka nei. Ka mutu ana āna akoranga i te kura tauira ka whakawhiwhia ia ki tētahi tohu whakahaere pakihi.

Kua whakatūria te kaupapa o ngā Kura Tauira Mahi a Te Puni Kōkiri hei tautoko i ngā rangatahi e kuhu atu ana ki te ao mahi me te hunga iti ngā tohu mahi. Ko tā te kaupapa nei, he āwhina i a rātou ki te whai mahi, ki te whiwhi tohu me te kuhu atu ki ngā momo whakahaere i te ao mahi.

I raro i te kaupapa nei, ka mahitahi a Te Puni Kōkiri ki ngā kaitukumahi me ngā kaiwhakahaere o ngā ahumahi nui ki te kimi, ki te whakangungu me te ārahi i ngā tauira Māori. Ka whai mahi utu ngā tauira nei mō ngā marama e ono, neke atu.

 

Ināianei, kei te mahi a Hohaia ki Ryman Healthcare hei Kaihautū mō ngā Pūrere Nui. He ihupuku nō te rangatahi nei, ka tonoa a ia ki tēnei tūranga e tētahi o ngā kaiwhakahaere. E 19 noa iho ōna tau.

“Ka whakaae noa mai ngā kaiwhakahaere kia whakamātau au i ngā momo pūrere nei. Ka kite rātou i taku pukumahi, ā, ka piki haere au i aku tūranga mahi, kātahi ka tonoa au ki tēnei tūranga,” te kī a Brown. “He pai tonu tēnei tūranga ki ahau, heoi, kei a au āku ake whāinga mahi hoki.”

Nō te wā i a ia i te kura tauira i te whai a Hohaia i tētahi Hōtaka Hanga Whare, arā, ka riro i a ia ētahi tohu e pā ana ki te mahi hanga whare.

Ki tā Hohaia, kei te pīrangi ia ki te whai i ngā mahi keri koiawa nā te mea, “he pai ki a au te mahi ā-tinana.”

“Ka ohorere tonu au ki te tere o te mahi whakatū whare. Ki te kite noa iho te tangata i ngā mahi hanga whare mai i waho o te whare, ka pōhēhē, ka roa pea, kātahi ka tutuki te mahi, heoi, he rerekē anō te tirohanga mai o roto o te whare. Ka tino kite koe i te wāhi ki tēnā, ki tēnā o ngā kaimahi.”

I mua mai i tana kuhu atu ki te kura tauira o AWF, i roto a Hohaia Brown i te kaupapa o te Limited Service Volunteer (LSV).

E ono wiki te roanga o te kaupapa o LSV. He kaupapa whakangungu rangatahi tēnei, e whakahaerehia ana e te Ope Kātua o Aotearoa mā te tari o Te Hiranga Tangata (Work and Income). Ko te tino whāinga o te LSV, ko te āwhina i ngā rangatahi ki te whai mahi, ki te whai kaha, otirā, ki te whai hoa hou i a rātou e whakatutuki ana i ngā mahi a te kaupapa i a rātou e noho ana ki tētahi puni ope taua.