A combined regional effort by different government agencies based in Hastings has earned them a spot at the national Māori Language Awards to be held in Napier later this year.
Published: Rāhina, 09 Whiringa ā-rangi, 2015 | Monday, 9 November 2015
Kua whirihia tētahi kaupapa mahi tahi i whai wāhi ai ētahi pokapū kāwanatanga ā-rohe motuhake ki te whiringa toa mō te tohu Kāwanatanga ā-Rohe ki Ngā Tohu Reo Māori 2015.
Ka whakatūria te hui tuku tohu e Te Taura Whiri i te Reo Māori, arā, ko te Kōmihana Reo Māori, ā, ka whakanuia te hiranga me te takohanga wā roa ki te reo Māori i ngā rāngai katoa puta noa i Aotearoa.
E ai ki a Monique Heke, ko te Kaiwhakarite mō te tari kei Ikaroa-Rāwhiti, kua manahau te rōpū mahi i te tautapahanga ki te whiringa toa o te kaupapa whakanui nei.
“Kua hari koa mātou kia kōwhiria mō te whiringa toa i roto i Ngā Tohu Reo Māori – he mea momoho, inarā mō tētahi kaupapa ahurei pēnei.”
Ka tae rawa ake te kaupapa ki te waihanga i ētahi rauemi reo rua whakatika mate ohotata ka tautoko hoki i te whakarauora i te reo ā-iwi me ngā kīwaha o Ngāti Kahungunu.
Ki tā Monique, “E rua tau i mua i hui ai mātou, ā, i taua hui tuatahi rā i matapakina ai e mātou te waihanga i ētahi rauemi whakarite mō te mate ohotata e hāngai ana ki ngā ratonga hunga kōhungahunga, kōhanga reo hoki.”
Ki tāna, “Mai i taua hui tuatahi i te tau 2013 kua eke a Me Noho Takatū ki ngā taumata, haere tonu ake.”
I tuaritia e te rōpū ngā pūkenga, te wā, me te mōhiotanga i hua mai ai ētahi rauemi reo rua i angitu ai te whakamahi i roto i te āhua 200 kōhanga reo, pokapū hunga kōhungahunga hoki – ka toro atu tata ki te 10,000 tamariki puta noa i te rohe o Te Matau-a-Māui.
I kī te kaiwhakarite o te kaupapa, arā, ko Jae Stherland, i tono rātou ki Te Rākau Whakamarumaru (arā, ko te Ministry of Civil Defence and Emergency Management) māna te pūtea mō te kaupapa whakatauira e tuku, ngā rauemi angitu e tohatoha hoki.
I kī a Jae, “I taua wā he ruarua noa iho ngā rauemi hei ako i te hunga tamariki i raro i te 7 tau te pakeke i te reo Īngarihi, waihoki, kore rawa he mea reo Māori. I tau te whakaaro i a mātou he ara ahurei tēnei kia ākona ai te hunga tamariki i te rohe o Kahungunu mō te whakatika mate ohotata me te reo hoki i te wā kotahi.
He pukapuka reo rua – arā, ko Te Hīkoi a Rūaumoko, Rūaumoko’s Walk – nā ētahi mātanga reo o Kahungunu, i takea mai i ngā pūrākau a Ngāti Kahungunu e pā ana ki ngā mea mōrearea o te rohe, i whakaahuatia ki te pikitia e tētahi ringa toi nō Ngāti Kahungunu.
Ko Materoa Haenga te ētita o te whakaputanga, he mātanga Reo Māori e mōhiotia ana ki te motu whānui. Me te aroha hoki, i mate atu ia i te Poutūterangi i tēnei tau. Nāna te mahi tino nui ki tēnei kaupapa hei etita o te pukapuka, waihoki ko tōna kaha tautoko hei kaihāpai o te whakarauora i te reo o Ngāti Kahungunu.
'Te kete pūrena a Materoa, hai waha i te kī’
‘Materoa, the purveyor of knowledge, whose generosity knew no bounds’
Ā te Rāhoroi 21 o Whiringa-ā-rangi 2015 ka tū te kaupapa o Ngā Tohu Reo Māori ki Pettigrew-Green Arena, ki 480 Gloucester, Tiriti, Taratēra, Ahuriri. Whakapā atu ki info@tetaurawhiri.govt.nz mō te pārongo tīkiti.