He whakahōnore i a Haane Manahi o Te Arawa me ana mahi hōia i te pakanga tuarua o te ao te kaupapa nui.

I te tekau mā whitu o ngā rā o Maehe i tēnei tau i pōwhiritia a Te Arawa e te Tiuka o York a Prince Andrew (te tama tuarua a Kuini Irihāpeti) me te Kāwanatanga o Aotearoa ki te marae o Te Papaiouru i Rotorua.

Ko Prince Andrew te kanohi mō te Kuini o Ingarangi, nāna nei a Lance Sergeant Haane Manahi me āna mahi nui i te pakanga o Takrouna i Awherika ki te raki i whakahōnore.

E toru ngā taonga a te whare ariki o Ingarangi i whakatakotoria e Prince Andrew hei whakanui, hei whakamana hoki i te rā. He reta i tuhia e te Kuini, he pare karakia, me tētahi hoari mai i te tōpuni taonga o te whānau ariki o Ingarangi.

E ai ki te Minita mō ngā take Māori, a Parekura Horomia, “e tino harikoa ana ahau, i tae mai a Piriniha Andrew ki Rotorua ki te kawe i te whakataunga mana kōwhiri.”

E ai ki a Parekura Horomia, “ko te wawata, kua tau, kua okioki te kaupapa ināianei.”

He hōia a Haane Manahi mō Te Rōpū Rua Tekau mā Waru, ā, i te tau 1986 ka aituā ia i roto i tōna waka i Te Puke.

I te tau o mua, i whakatūria ai he komiti ki te whai i te tohu tiketike, arā, te Ripeka o Wikitōria. Ahakoa kāore i whakawhiwhia taua hōnore nui ki a ia, ka whakaae te komiti ki te whakatau i tēnei take mō tōna whānau me Te Arawa whānui.