Kaore e kore kua kitea e koe i ngā hei tiki a Vicki Morehu (Te Atihaunui a Pāpārangi) e iri nei ki ngā kaki o te tini tāngata.

Ka tīmata a Vicki i tana pakihi me te mahi i ngā tiki Māori o nāianei mai te uku mo tana whānau, nā wai rā ka tīmataria e ia ki te hoko atu i ana taonga toi nei.

Ko Te Pono Design Ltd tana pakihi ko te hokohoko i ana mahi toi pērā me ngā toi Māori, toi Kiwiana hoki - mai ngā hei tiki ki ngā whakakai taringa, ngā pouaka pire ki ngā taonga mau koti, panekoti hoki.

“Ko aku taonga katoa kei ngā toa hokohoko toi 30 huri noa i te motu,” hei tā Vicki.

“Kaore au i mōhio ka huri taku mahi aroha hei pakihi, me te mea nei ka taea e au te mahi i aku toi me te tiaki i aku tamāhine me taku whānau,” hei tāna.

Kei Ōrākei a Vicki me tana hoa rangatira a Te Aroha Morehu (Ngāti Whātua) e noho ana toko toru a rāua tamāhine.

I te tau 2007 ka toro atu a Vicki ki Te Ratonga Kaipakihi Māori o Te Puni Kōkiri ki te āwhi i tana pakihi. “Ka rawe rā te tautoko a Te Puni Kōkiri i a au me ōku moemoea mo taku pakihi,” hei tā Vicki.

“I āwhi rātou i a au ki te whakawhanaunga me ngā kaipakihi Māori o taku rohe, i tautoko hoki rātou kia whakaoti ahau i taku mahere pakihi,” hei tāna anō.

Mo ētehi atu whakamāramatanga tirohia ki te paetukutuku a Vicki: https://www.facebook.com/Te-Pono-Design-111071385598091/ .