Mai te whā miniti ki te haurua haora te hua i puta i ngā whakanui mō te rua tekau mā rima tau a te hōtaka pūrongo reo Māori a Te Karere.

I te tuarua o ngā rā o Hui Tānguru ikapahi atu ai ngā mana nui o te ao Māori me te ao pāho ki te whakanui i te rua tekau mā rima tau a Te Karere.

“Nō Te Reo Tātaki o Aotearoa me Te Karere te hōnore i tae mai ai Te Arikinui a Kīngi Tuheitia ki te whakamanawa i te kaupapa,” hei tā te rangatira a Te Karere a Shane Taurima.

“Ehara i a mātou tēnei taonga, nā te iwi kē. Nō reira, ko taku īnoi ki te iwi, tiakina, tautokona, kia ora ai ia mo ake tonu,” hei tāna.

Rahi ake i te kotahi rau tāngata i tae ake ko te Minita mō ngā Take Māori a Pita Sharples, ko Timi te Heuheu o te whare ariki o Ngāti Tūwharetoa me Kīngi Tuheitia.

Hei tā Derek Fox tētahi o ngā kaiwhakaū a Te Karere, kaore i pai te whakaaro mo te hōtaka ki ngā rangatira Pākehā o Te Reo Tātaki i te tīmatanga.

Engari ia nā te arohanui ki te reo Māori i whawhatia tonuhia ai e mātou kia whakarewa i tētahi hōtaka pūrongo reo Māori ki te pouaka whakaata, ināianei he rua tekau mā rima tau te roa o tana pāhotanga ki te ao me mihi ka tika, hei tā Derek anō.

I whakahoungia e Te Reo Tātaki i te ruma pāho a Te Karere me te waiata tīmatanga hei kinakitanga mo tana rā whānau.

“Ko ngā ringaringa me ngā waewae o Te Karere, ka mau tonu. Engari kua whakarēreketia te hanga o te tinana me ngā kai o roto,” hei tā Shane.

“Tērā ētahi wāhanga hou kua whakaritea e mātou, pērā i te paepae kōrero. He taumata tēnei hei āta matapaki i ngā kaupapa nui o te rā,” hei tāna anō.

“Ko te kaupapa te mea nui. Ko te reo Māori kia mau tonu. Ko te reo o te Māori, kia rangona, kia kōrerotia.”