HE TUKEMATA, HE RAU WHAKAOHO HE TUKEMATA, HE RAU WHAKAAKO HE TUKEMATA, HE RAU WHAKAMAHI HE TUKEMATA, HE RAU WHAKAMANA TĪHEI MAURI ORA

I ngā tau 1800 i pūāwai ai te reo o Ngāti Kahungunu ki te rohe whānui o Ngāti Kahungunu, engari i ngā tau 1900 i waikura haere tō rātou reo ake.

Nō roto i ngā tau tekau ki muri i tīmata ai ngā whānau o Ngāti Kahungunu ki te wānanga, ki te rangahau hoki i ngā ara e tae ake ai te reo o te iwi ki tōna ikeikenga.

I hua mai taua kaupapa i “He Mahere Rautaki Hai Haumānu i te reo o Ngāti Kahungunu 2006-2027,” i whakaterea i tērā tau ki te marae o Ōmāhu.

“He kaupapa tino tata ki taku ngākau, ka whai tonu au i te kaupapa nei ahakoa te aha,” tā Ihaia Hutana, Poutiri ā Reo mō Ngāti Kahungunu.

“E whā ngā kaupapa o te rautaki ko te whakaoho, te whakamana, te whakaako, me te whakamahi engari ko te kaupapa ake kei roto i ngā kaupapa katoa ko te whakawhanaungatanga,” tā Ihaia.

Ka noho ēnei kaupapa hei tūāpapatanga mō te rautaki.

Kua roa nei a Te Puni Kōkiri e tautoko ana i tēnei kaupapa.

Hei tā te Kaiwhakahaere ā rohe mō Te Puni Kōkiri ki Takitimu a Roger Aranui, e tika ana kia mahi tahi a Te Puni Kōkiri me te iwi o Ngāti Kahungunu ki te tautoko i ō rātou wawata e pā ana ki tō rātou reo ake.

“Ko te mahi a Te Puni Kōkiri ko te kōkiri whakamua i ngā kaupapa whakanui i te tuakiri o te Māori pēnei me te whakarauoratanga o tō rātou reo.”

E ai anō ki a Ihaia he nui tonu ngā painga kua puta i tēnei tau engari he nui hoki ngā mahi kei mua i te aroaro.