I te tau 2006 i rēhitatia te Rōpū Mekemeke o te Tairāwhiti hei rōpū motuhake i raro i Te Tari Kamupene o Aotearoa. I mua ake i tērā, i noho ngā kaimekemeke o tēnei rohe i raro i ngā parirau o te Matau o Māui.

Mai i taua wā, kua tipu ngā karapu o Wairoa, Bay City me Patutahi ki roto o Tūranga, Ngā Uri a Ngā Tama Toa ki Ruatoria me Hicks Bay.

Na te āwhina o Te Puni Kōkiri, kua māro te tūāpapa o te rōpū i te whanaketanga o ngā pūkenga, ngā kaiako, ngā kaiwawao, ngā kaiwhakawā, ngā kaiwhakahaere me ngā kaimekemeke.

I ngā marama kua hipa ake nei, 10 ngā tāne me ngā wāhine i timata ki te takahi i te huarahi kia whiwhi rātau i te tohu kaiwhakawā o te New Zealand Boxing Referees and Judges Association. Kia whiwhia tēnei tohu, ko Gerry Heeney, tētahi o ngā kaiwhakawā e rua o te Rōpū Mekemeke o te Tairāwhiti kua whai tohu kē, te rōpū e ako ana i mau atu ki ngā whakataetae 13 huri noa i te Ika a Maui mai i Tāmaki Makaurau ki te Raki, ki Taranaki ki te Uru, Poneke ki te Tonga , ki te wā kainga ki te Tairāwhiti me ngā wāhi katoa i waenganui.

Mutu ana tētahi whakamātautau tuhituhi, ka tukuna kia whakawāngia ētahi whawhai, ka āta kārawarawatia ā rātau piro e ngā kaiwhakawā matua. Ka mutu te whakawā 30 ngā whawhai, ka whiwhi i te tohu mo te Kaiwhakawā Mekemeke.

Tokowaru o ēnei i whiwhi i ā rātau tohu ki te whakataetae North Island Novice Champs ki Rotorua i te marama o Hepetema. Ko te mea miharo, he rangatahi te nuinga, he Māori te katoa. Mīharo ana te ao mekemeke ki te rōpū pēnei te tokomaha kua eke ki tēnei taumata i te mea, he koroua pākehā te nuinga o ngā kaiwhakawā. He ataahua hoki te rōpū nei i roto i ō rātau kākahu tōtika pērā i te mea, he rōpū e whai ana i te taumata tiketike i roto i tēnei tākaro.

Tokorua hoki ngā kaiako mekemeke no Ruatoria i whiwhi i ā rāua raihana taumata 2 mo te whakaako. E rua ngā rā te roa o te wānanga, he whakaako atu i ngā pukenga, he whakamātautau tuhituhi mo ngā pukenga, te hanga o te tinana, te whakahaere i te taumaha o ngā kaimekemeke, ngā mahi whakapakari tinana, whakapakari hinengaro, me ngā tikanga whakaako kia puta ia kaimekemeke ki tōna ake taumata. Na tēnei tohu, ka taea te tono mo ngā turanga hei mau i ngā kaimekemeke o Aotearoa ki rāwāhi.

Na ngā pūkenga kua riro mai i raro i tēnei kirimana, kei te tū pakari te Rōpū Mekemeke o Te Tairāwhiti. Kei a mātau te kaha ki te whakahaere i ā mātau ake whakataetae, ki te whakaako i ā tātau tama me ā tātau tamāhine i ngā pūkenga kia eke rātau ki ngā taumata tiketike, kia tū rātau hei kaihautū ā ngā tau e heke mai nei.