Mēnā kei Tāmaki Makaurau koe e noho ana, ā kei te kimi haere koe i tētahi kamupene tunu kai reka mō tō hui tēnā whakapā atu ki Bennetts Cuisine Catering.

Ko te pakihi tēnei a Rawinia McCallum (Te Arawa, Te Ātiawa) kei te rohe o Tāmaki Makaurau ki te raki.

Nō te tau 2002 i whakatū ai a Rawinia rāua ko tana tuahine i te pakihi nei.

Nō te tau 2006 ka hūnuku atu te tuahine a Rawinia ki Turanganui ā Kiwa noho ai. I taua wā hoki ka riro mā Rawinia anake te pakihi e hautū.

Nō Aotearoa ana kai katoa, ā, he kai Māori, mai i te kīnaki tītī ki ngā rengarenga tuatua. “Me kōrero tahi ahau ki tēnā, ki tēnā o aku kiritaki ki te hanga rārangi kai māna,” tā Rawinia.

Nā wai rā ka whanake te pakihi, ā, ka whātoro atu ki Tāmaki Makaurau whānui. Nō tēnei tau tonu ka whai wāhi atu te pakihi a Rawinia ki ngā kaupapa whakanui i a Matariki ki Te Whare Wānanga o Massey, ki tētahi kaupapa ki Te Whare Taonga o Tāmaki Makaurau, me tētahi whakaterenga waka hou ki Toyota.

Nō te tau 2006 ka tupono noa atu a Rawinia ki ngā kaiwhakahaere ā-rohe o te Ratonga Kaipakihi Māori a Te Puni Kōkiri a April Erueti rāua ko Ngaire Wilson.

“Nā Te Puni Kōkiri te utu mō tētahi kaiārahi pakihi, he roia a ia e ngākau nui ana ki te kai nā reira he whanaungatanga pakihi pai tēnei māku,” hei tā Rawinia.

Kei te titiro whānui a Rawinia ki te whakatupu i tana pakihi. Kei aro nui atu ia ki te tau 2011, te wā o te kapu whutupōro o te ao me te tini o ngā mahi ka hua mai mō te ohanga o te rohe. Mō ētahi atu whakamāramatanga tirohia te paetukutuku: www.bennettscuisine.co.nz.