E ngā iwi o te motu, koutou ngā kanohi ora o rātou mā kua whetūrangitia, tēnā koutou katoa.

Tēnei au, otirā māua ko Georgina te Heuheu e mihi atu nei ki a koutou i o māua turanga hou hei Minita Māori.

Nā te kaha tautoko a te iwi whānui i a mātou ko a māua rōpū tōrangapū māua i kōwhiri hei Mema Pāremata, hei kaimahi mā koutou, hei reo mo koutou, e ai ki ngā tikanga kawanatanga.

Nō reira me kī, nā koutou māua i whakatū ki ēnei turanga, me te whakapono, mā māua a koutou take e kawe ki mua i te aroaro o te kawanatanga, kia pūāwai ai ngā tumanako o te iwi.

Heoi anō, e whakapono ana māua, arā mātou ko ngā mema Māori o te kawanatanga, kei tēnā whānau, kei tēnā hapū, kei tēnā iwi tōna tikanga. Kei tēnā, kei tēnā tōna rangatiratanga. Heoi anō tā mātou o te kawanatanga, he atawhai i ngā whānau, ngā hapū, ngā iwi kia ora ai; he hanga kaupapa e tū pakari ai te tangata whenua; he tuku i ngā mahi kia rere.

Kei waenga i ngā whārangi e whai ake nei, tūturu ka kitea te tikanga o ēnei whakaaro. Huri noa i te motu, kei te whakapau kaha ngā tangata toa, ngā toki hākinakina, ngā tamariki mātau, ngā pukenga, kia eke ki ngā taumata e tika ana mō rātou, mō tātou katoa. Kua uru atu tātou Ngāi Māori ki ngā momo mahi katoa o te ao – te pakihi, ngā mātauranga pūtaiao, te ahuwhenua, ahumoana, te kawe kōrero, te hangarau. Kei ā tātou ngā momo mātauranga katoa.

Tēnā, kei a koutou te tikanga – kōkiritia!
Kia ora,
Hon Dr Pita Sharples,
Minita Māori