Ko te reo whakamihi me te wairua Māori i rongohia e te hau kāinga o Te Whanganui a Tara i te rā tuatahi o Te Wiki o te Reo Māori.

I te taunga waka rerewhenua Te Taura Whiri i te Reo Māori me ana hoa tautoko, arā Te Puni Kōkiri, Te Kāhui Tika Tangata, Te Kōmihana ā Whānau, me Te Uepu Matua o Te Kōhanga Reo e tītari ana i te hua rākau me te pukapuka ako i te reo ki ngā kaieke tereina.

Ko te kaupapa matua mō tēnei tau ko Te Reo i Te Kāinga.

E ai ki te kaiwhakahaere matua o Te Taura Whiri i te Reo Māori a Huhana Rokx, “kua piki ake te kōrerotia o te reo i roto i ō tātou kāinga, i waenganui i ngā pakeke me ngā tamariki.

Ko te kaupapa matua i tēnei tau, ko te tautoko, te whakatenatena me te whakahihiko i te hinengaro o te tangata, kia kaha tonu ai te rongohia o te reo ki roto i ō tātou kāinga.”

He maha ngā mahi i tutuki pai i ngā whānau, ngā whakahaere, ngā tari Kāwanatanga ā motu, ā rohe me ngā kura hoki ki te whakanui, ki te whakatairanga hoki i te reo.

“Kei te mīharo katoa au ki te kaha o te iwi whānui ki te whakanui i te reo, i Te Wiki o Te Reo Māori,” tā Huhana Rokx.

Ka tū Ngā Tohu Wiki Reo Māori ā te marama o Mahuru ki te whakanui i ētahi o ngā kaupapa whakanui o te motu. E iwa ngā wāhanga – wai ka hua, wai ka tohu.