Ko te kaupapa matua o Te Wiki o te Reo Māori 2008 ko Te Reo i te Kāinga. Nā reira kei te kāinga a Kōkiri o tētahi whānau Māori e āta wherawhera nei i ō rātou moemoeā reo Māori.

Ko Marama Steele o Ngāti Porou rāua ko William (Will) Moore o Ngāiterangi me tā rāua tamāhine a Tahunuiorangi Moore te whānau Steele-Moore kei Te Whanganui ā Tara rātou e noho ana.

“Ko te kāinga te tūāpapatanga ki te whakawhanake i te reo Māori nā reira ka whakapau werawera mātou ki te ako i te reo i te kāinga,” tā Marama Steele.

“Kei te tino hiahia māua ko Will kia pakeke mai a Tahunuiorangi i te reo Māori, na reira kei te ako tahi mātou,” hei tāna anō.

I pakeke mai a Marama i Rotorua, he matatau tōna koka ki te kōrero i te reo Māori. Heoi anō he Pākehā te whakatupuranga mai a Will engari he koingo nui tōna mō te reo Māori me ōna tikanga.

Ahakoa nō ngā ao e rua te tokorua nei, i te whānautanga mai a Tahunuiorangi i te tekau mā toru o Paenga Whāwhā i te tau rua mano mā whitu ka nui tō rāua hiahia mo te reo Māori.

“Kei te hiahia māua kia rumaki a Tahunuiorangi ki tana Māoritanga, mā te reo Māori me ōna tikanga ka whakatairanga i tōna tuakiritanga ahakoa kei hea ia i te ao whānui nei,” tā Will Moore.

Kei te whātoro atu a Will ki ngā kaupapa rauemi reo Māori mā te hangarau ki te tautoko i te whakaakoranga reo Māori a tōna whānau. Kei Te Puni Kōkiri a Marama e mahi ana hei kaitātari mo te reo Māori me te ao pāpaho Māori.