Ko ngā whenua ko te taitonga o Arikikapakapa, ko te whenua rāhui o Ngā Waiariki o Whakarewarewa me te whenua rāhui o Roto ā Tamaheke.

Ko ēnei whenua rāhui katoa he taonga tuku iho mō te oranga tonutanga o ngā tikanga ā iwi, me te aha, ko te Roto a Tamaheke te kāinga o ngā waiariki rongonui pērā me te waiariki o Pohutu.

“Kei te tino harikoa mātou kua hoki mai te mana o ngā taonga ā ō mātou mātua tūpuna,” hei tā Anaru Rangiheuea kaumātua o Tūhourangi.

“Ko te mahi ināianei he tiaki, he manaaki i ngā taonga nei mō ngā uri o ngā iwi me Aotearoa whānui,” hei tāna anō. Karapinepine atu ai ngā mana o Tūhourangi-Ngāti Wāhiao me Ngāti Whakaue ki te Whare Pāremata i Te Whanganui ā Tara mō te hainatanga i te whakaaetanga me te Minita Take Tiriti o Waitangi a Michael Cullen, te Minita mo ngā Take Māori a Parekura Horomia me te Minita Take Tāpoi a Damien O’Connor.

Kei raro i te whakaaetanga ka whakahaeretia tonutia ngā whenua rāhui nei hei whenua tāpoi, hei whenua pārekareka hoki mō te katoa.

Ehara te whakaaetanga i te whakataunga kerēme i raro i te Tiriti o Waitangi. Ahakoa kei roto i te kerēme a Te Pümautanga o Te Arawa ngā whenua rāhui o Ngā Waiariki o Whakarewarewa me te Roto ā Tamaheke. Hei te rā o muri mai i te whakaturenga o te pire a Te Pūmautanga o Te Arawa ka whakawhitihia atu ngā whenua e rua ki te taratihi o ngā iwi e rua.

Hei tā te Minita Take Māori a Parekura Horomia kei te hākoakoa ia kua whakaae te Kāwanatanga me ngā iwi a Tūhourangi Ngāti Wāhiao me Ngāti Whakaue.

Hei tāna anō me mihi ka tika ki ngā iwi mō rātou i mahi nui ki te whakatutuki i te whakaaetanga.