Published in: Kokiri Issue 3 - Hōngongoi - Hereturikōkā 2007
Nō te rohe o Tainui te angitū i te Whakataetae Poitarawhiti Māori ā Motu 2007.
I roto i te whiringa whakamutunga o te reanga pakeke ka tūtaki a Tainui ki a Tāmaki Makaurau, ā ka riro i a Tainui te ipu a Koro Wētere.
E rima ngā kapa poitarawhiti nō ngā takiwā Māori tekau mā tahi i whakataetae mō ngā hōnore nui. E rima ngā reanga whakataetae, mai i ngā rangatahi tae atu ki ngā pakeke.
He mea whakahaere te whakataetae e Poitarawhiti Tāmaki Makaurau, Aotearoa Māori Netball Oranga Healthy Lifestyles me Te Rōpū Wāhine Māori Toko i te Ora.
“I ū ki ngā kaupapa ko te tikanga me te oranga o te tangata, i rongorongo hoki te manaakitanga,” tā Evelyn Tobin o Poitarawhiti Tāmaki Makaurau.
Nō te tau 1995 i whakatūria te whakataetae e Aotearoa Māori Netball Oranga Healthy Lifestyles hei whakawhanake i te hauora me te poitarawhiti Māori.
Hei whakanui i te ekenga o te poitarawhiti Māori ki te rua tekau o ngā tau ka whakarewaina tētehi pukapuka e kïa nei ko He Kohikohinga Mahara – 20 years young.
He mea tautoko te pukapuka e Te Puni Kōkiri.
E hia kē nei ngā pūkenga poitarawhiti kua pā ō rātou ringaringa ki tēnei o ngā whakataetae pērā i a Temepara George, Noeline Taurua me Waimarama Taumaunu.
“Ka nui ngā mihi ki a Pauline rāua ko Arapeta o Te Puni Kōkiri ki Tāmaki Makaurau mō te āwhina me te mahi tahi kia tutuki pai ai te tono,” tā Evelyn Tobin.
Ā te tau e tū mai nei ka tū te whakataetae ki te rohe o Te Tai Tokerau.
Te Arawhata Toa
| Ngā Reanga | Ngā Toa | Tuarua |
|---|---|---|
| Te Tohu Ake Mō Te Rohe Toa | Tainui | |
| Pakeke (Te Ipu a Koro Wētere) | Tainui | Tāmaki Makaurau |
| Kei raro i te 19 tau | Ikaroa ki te Raki | Waiariki |
| Kei raro i te 17 tau | Ikaroa ki te Tonga | Ikaroa ki te Raki |
| Kei raro i te 15 tau | Ikaroa ki te Tonga | Tainui |
| Kei raro i te 13 tau | Waiariki | Tainui |